حوار الكبار بين ماردونا مدرب الارجنتين وفجر مدرب المنتخب السوري

كما يعرف الكثيرون فقد درج على ألسنة الناس تشبيه المدرب العالمي فجر بمارادونا نظراً للتشابه الكبير ليس في الشكل بل في النتائج والإنجازات...

انطلاقاً من ذلك ومن كثر ما الناس صارت تجيب سيرة مارادونا على مسمع مدربنا العالمي فجورة ، انزعج فجورة كتير من هيك مقارنة وطلب من المسؤول (الواسطة) الذي دحشه كمدرب لمنتخب سوريا أن ينظم مذكرة إحضار بحق المدعو مارادونا بتهمة التشبه بالمدرب الكبير فجر.

وخلال 5 دقائق كان المتهم مارادونا ماثلاً أمام المساعد جميل الذي لقنه درساً في عدم التشبه بالكبار، وبالرغم من أن مارادونا لم يعرف سبب الفلقة التي أكلها إلا أن صدمته بمواجهة السيد فجر كانت أشد من الفلقة...

قام السيد فجر بإجراء التحقيق بنفسه نظراً لرغبته في معرفة الشخص المغمور جداً (مارادونا) الذي حاول التشبه به ... ومثل أي محقق طلب فجر من مارادونا التعريف بنفسه.

استغرب فجر من المتهم مارادونا جرأته واعتداده بنفسه عندما قال: أنا أسطورة الكرة !! فردّ عليه فجر بنفس الكبرياء: أنا أحسن منفذ رميات تماس في العالم !! . استغرب مارادونا وقال له : أول مرة بسمع انو في تصنيف لأحسن منفذ رميات تماس...

تابع مارادونا: أنا صاحب أفضل هدف في تاريخ كأس العالم عندما راوغتُ 7 لاعبين انكليز في 1986

وجاء رد فجر: إذا انت راوغت 7 لاعبين فأنا استطعت مراوغة 20 مليون سوري والبقاء رغماً عنهم !!


استغرب مارادونا ولكنه تابع التعريف بنفسه: أنا لم أكن لاعباً عادياً بل كنت وما زلت رمزاً لرياضة بلدي بل حتى عندما يذكر اسم بلدي يتذكر الكل اسمي ، استغرب فجر من هذا الكلام وقال له: شو اسم بلدك ؟!

مارادونا: معقولة ما بتعرف الأرجنتين

فجر: لا

مارادونا: بطلة كأس العالم مرتين

فجر: شو يعني كأس العالم ؟! أنا أكتر من الدوري السوري ما بعرف ولا بهمني أعرف.

مارادونا: سيدي أرجوك، شو سبب حضوري لعندك؟!

فجر: وصلني خبر انك عمتتجرأ تتشبه فيي، لك ما بتعرف مين أنا ومين واسطتي ؟!!

مارادونا: لا

فجر: قالولي انو انت مدرب جديد

مارادونا: صح ، صحيح كنت لاعب عظيم بس أنا مدرب جديد فعلاً.

فجر: يعني بدّك كتير لتصير متلي.

مارادونا: ليش حضرتك مدرب؟!! والله فكرتك معلمو للمساعد جميل...

فجر: خراس ولك... صحيح انك قليل أدب متل ماقالوا.

مارادونا: و شو إنجازاتك بالتدريب؟

فجر: المركز التاني ببطولة الهند العالمية...

مارادونا: غريب، انا اول مرة بسمع بهيك بطولة.

يحاول المساعد جميل التدخل ولكن فجر يقول له اتركو

فجر: طيب .. شو مؤهلاتك لحتى تكون مدرب

مارادونا: سمعتي كأفضل لاعب في تاريخ بلدي والعالم. العفو منك : انت كمان كنت أفضل لاعب حتى اختاروك؟!!

فجر: (بكل تواضع ) لا. بس المؤهلات اللي عندي ما توفرت عند أي لاعب او مدرب بتاريخ سوريا.

مارادونا: وأنا راح كون متواضع وقول: صحيح اني استلمت التدريب بس الخسارات اللي اكلتها الارجنتين بوجودي كانت مميزة!!

فجر: ليش شو كانت اكبر خسارة؟

مارادونا: ضد بوليفيا الضعيفة خسرنا 6-1

فجر: لا تفكر حالك وحيد زمانك، انا خسرت امام ماليزيا وبالأربعة ، يعني حتى بالخسارات انت مو احسن مني...

مارادونا: اغلب جماهير الارجنتين انقلبت علي وصارت تطلب استقالتي بس تاريخي الكبير كلاعب بيحميني

فجر: وأنا كمان أغلب جماهير سوريا بتطلب استقالتي بس انا مطنش..

مارادونا: غريب... يعني تاريخك كأفضل منفذ رميات تماس بيحميك كمان؟!

فجر: بلشت تحشش؟!!

مارادونا: ليش يا سيدي؟

فجر: انا ما بهتم شو بيقولوا الناس هون ، حتى لو شبعوا حكي بالمنتديات ، أصلاً انا ما يهتم لهدول الناس ابداً..

مارادونا: ليش

فجر: هيك

مارادونا: غريب كيف يعني ؟!

فجر: طالما القاضي راضي يروحوا يبلطوا البحر

مارادونا: مين القاضي؟

فجر: ما دخلك. بس بما انك غريب راح قللك شي

مارادونا: شو؟

فجر: شايف كل اعتمادك على اسمك العالمي ؟ ما بيساوي الدعم اللي عندي

مارادونا: شو قصدك بـ (الدعم)

فجر: الناس هون بتعرف انو ما إلي علاقة بالتدريب بس بيعرفوا كمان انو الناس اللي جابتني للمنصب هي بتعرف كيف تثبتني من دون ما طير..

مارادونا: يعني حطولك لاصق قوي على قفاك ؟!

يحاول المساعد جميل أن (يلبط) مارادونا ، ولكن فجر يقول: اتركو للأجدب..

مارادونا: ببوس ايدك يا سيدي تطلق سراحي..

فجر: روح انقلع ولا ولكن:

كل ما أطلبه منك يا مارادونا هو أن تتخلى عن منصبك كمدرب لأن إنجازاتك شابهت انجازاتي بدرجة كبيرة وهذا أضر بسمعتي التدريبية الكبيرة ... يعني مو معقول الناس هون صارت تقول: فجر له شبيه

أي شفتهاااااااااااااااااااااا