رحلة أعضاء منتدى كلية الأداب على مزرعة كرمو الجزء الآول

موضوع خاص ناص بأعضاء منتدى المحترمين بتمنى أنو ينال إعجابكم

رحلة أعضاء منتدى كلية الآداب و العلوم الإنسانية إلى مزرعة كرمو

هاد الموضوع للي بحبو الرحلات والطلعات
واللي ما بحب مو بكيفو بدو يروح معنا

لذلك قررنا انو نطلع سيران يوم الجمعة على مزرعة كرمو

وبعد ما رجعنا حبيت وثق الأحداث اللي صارت

تابعوا معنا يا كرام

انطلقنا في الصباح الباكر .. والرحلة كانت مجانية من حيث المواصلات لأنو مدير المنتدى مازن الحمود قرر يكون دعم مادي لهالرحلة من حيث المواصلات
وأستأجر شاحنة وطلعنا كلياتنا من ورا ما عدا هو وأبو جمال (maher.m.b.k) طلعوا جنب الشوفير ( قال يعني شايفين حالهن )

اتكفلنا أنا و شاعر الليل بجمع تكاليف الأكل واخدنا من كل واحد مية ورئة .. ثوندرستورم غص عليها وما دفع غير خمساوسبعين .. وبرر الخمساوعشرين بحجة انه من الجسر رحنا ليلة الخميس أنا و شاعر الليل واشترينا خاروف كامل مشفّى وجاهز للشوي مع الغمة لأنو في أعضاء بيحبوها مثل (هلا و سكاي ستار)

واشترينا فواكه وكولا وبزر وعدة السلطة

ووزعنا باقي الأغراض من مستلزمات شواء وفرم وأواني وشاي وقهوة والذي منو على الأعضاء
ورح نشوف بعدين شو كل واحد جاب معو

الجمعة الساعة 6 الصبح بلش مازن الحمود يمر على الأعضاء على بيوتهن وهو حاطط شريط طنادو ومعلي الصوت على الآخر بأغنية ستة الصبح .. وأول واحد عدا عليه أبو جمال (mahr.m.b.k) قال منشان ما يروح محلو جنب الشوفير لأنهم بدهم يحكوا حكي شفترة وما بدهم نسمع

وبلشوا يلموا الأعضاء كل واحد حسب ترتيب بيته ومنطقته ويعبونا بالشاحنة من ورا

اكتمل النصاب الساعة 7 الصبح .. وانطلقنا .. وحصل الآتي على ظهر الشاحنة:

( سلام ) كانت مادة السجادات بأرض الشاحنة وعبتزور كل واحد ما شلح من أجرو

ونحنا على الطريق .. سمعنا شخص عبصيح وبيركض ورانا ..
التفتنا عليه وإذ (سكون الليل) حاطة الملحفة بتمها و ابنتها على ايدها وعبتقول :

لااااااااااااااااااك .. استنوني خدوني معكن لاشو انسيتوني ؟؟؟

moon light : ( دق دق دق على الشاحنة ) وقف يا ابو اصطيييف .. اجت (سكون الليل))

ايبرا بسره عم يقول : ( الله يجيرنا )

مازن الحمود للشوفير : وقف لك خاي زكاتك معنا راكب ناقص

طلعت سكون الليل): يبعتلكن الدعبلة كلكن يا نسوان ..كيف بتروحوا من دوني ..؟؟

هلا :: يييي يا سكون الليل)لك مو علمتلك على الموبايل .. ليش ما نزلتي أوام ؟

سلام : صلوا عالنبي هلئ .. ولا تخلو الرحلة قهر من أولها وتحرونا

سكاي ستار : هاتي هالبنت لك خيت لدير بالي عليه
ثوندر ستورم .. وهو على كرسي بصدر الشاحنة جايبو معو من الجسر : يخليلي عينكن لا تعملولي ءصص .. الله يسعد صباحكن بالخير وزءزءة العصافير يا وجوه الخير .. سمعونا شي طءطوءة يخليلي ءلبكن ..!!

sad angel : عطيني هالقانون لك moon light خلينا نغني شي غنية ل أبو حسن الحريتاني

moon light : وين حيطو لك خاي .. ليكون هاد اللي معلق بالحبل؟!
sad angel : ياياب ع الله مين علقوا هون لاك .. هاتو لشوف
وبلش يدوزن Sad angel .. و صار يغني
مون لايت : عطيني ايشابك ليك هلا نور .. بدي اوم هز

سلام : بروك لاك وين مفكر حالك .. بصالة الحمرا ؟؟

هلا : ليك سكاي ستار .. وين الدربكة ؟؟ هاتيها لشوف
وبلشت .. دربك دربك دربك دربك ترررررررررك

ونشزت على معزوفة sad angel

مد ابو اصطيف (هوي الشوفير) راسو من أدام : لك يا جماعة قعدوا عاقلين هلئ .. على القليلة بس نطلع برا المدينة بلا ما يخالفونا
( ومد يده على جيب القميص وانتشل سيكارة حمراء طويلة وضيفها لمازن الحمود الشوفير صف على اليمين ولفو لمازن الحمود ومن ثم وضع يديه على راسه وقال : عراسي يا خاي .. ف أختي حبيتك من أول ما شفتك

وتابع الشوفير طريقه

ابو جمال (maher.m.b.k) كان نازل من الشاحنة .. ووقت مشت تعربش ونط عليها وقال :
لك وين رحتو ؟؟ نزلت جيب قطة شفتها على الكروزة يعني ( حرف الطريق ) .. قلت خطي منطعميها معنا لحمة

lookinh for galory : لاياااا .. إذا بتنقص اللحمة نتفة بدي مصراتي
بروكين هيرت : معليش لا تخاف .. حاسبة حسابنا وجايبة أضوضات زعتر

صمت الوداع : والله نشف تمنا .. اشو جبتلولنا بالمية ورئة ؟؟ انشالله ما في فطور ؟؟

( ندى ) جايبة معها غاز سفري وحطت عليه الركوة وبدها تغلي قهوة :

يا (هلا نور ) وين القهوة .. هاي عأساس انت تجيبيها من عند( كادو) .. هاتيها لشوف

(هلا نور ) : اي ايييييي لاشو عبتعيطي .. مسكي جبت كيلوين

ثوندر ستورم .. ايبرا.. moonlight .. sad angel .. فاتحين بوطة وصواتهن وصلانة لمزرعة كرمو

ثوندر ستورم : طب الختيار يا ايبرا لا تدق هااا .. كوا ترى الدقة بتلاتي ونص

ايبرا : دي لعاب لعاب .. بس شفتني دقيت يبقى احكي

moon light : تركو خاي ايبرا .. اذا بلقطو بدي حرم امسك ورق ادامو

sad angel : خيهيبسييلالسيبلايبلاسي... هاي اشارة لشريكو أبو النور منشان يلعبلو بستوني

هلا وسلام وسكاي ستار وأميرة السلام وسكون الليل وهلا نور و شمس ا... مجتمعات مع بعضهن بالأرنة وعبيلعبوا" حدَي مدَي على أجرَي " وكل تنتين عبيحكوا وبيشلوا على وحدة تانية

ندى : عيني ربكن على هاللعبة .. والله أبعرفها من قبل .. قومي ولك هلا تنشرب متة ونحن منلعب

هلا : اي بالله هنتي عيني .. بس خلي عينك على هالجوز اللي جنبك .. شايفة عيونهم بلشت تزوغ

شاعر الليل : أنا قايم اكتب قصيدة أحسن من هل اللعب و مضيعة الوقت

هلا : ما حدا جايب معو راديو ..هلئ بيطلعو الأبراج .. قظ القرض

moonlight معه راديو صغير وعبيسمع الأخبار : طولي بالك لك خيت بدنا نشوف اشو صاير بالدنيا ؟؟

فجأة ينعطف الشوفير يمين ويسار وهو مشغل الزمور على آخرو ..

نطينا كلياتنا على جهة وحدة من الشاحنة واذذذذذذذذذ:

عنننننننننننننننننننننن ... (دارك لايت ) يقود طرطورة ويبتسم لنا .. وهو عبي أنفل ( تزويد الطرطورة بالبنزين تارة وتركه تارة أخرى ) ومشغل شريط لطنادو .. موال السجن
نزيييل يو اخوي مازن طلاع معي ..

مازن : يييي الله يحميكن يا شباب .. لك جهاد حسون ليش خليت (دارك لايت ) يجي بالطرطورة .. ما بتخاف عليه ؟

جهاد حسون : ها هااااااا .... ضلينا ساعة نحكي معو وماكان يرد ..راسو وألف سيف بدو يجيب طرطورتو

ابو جمال (maher .m.b.k) : وقف يو ابو اصطيييف (الشوفير ).. بدي انزل على الطرطورة .. يحرق اخت هالشريط ما أحلاه

مازن الحمود : لاك ابو جمال ..صار مرتين وقفتني ها .. الشوفير بلش يتزايا من ال منا ..!!

أبو جمال : خلص لا توقفو .. بس خففوا السرعة شوي وانا بنط ..

ونننننننننننننن .. أبو جمال صار بالطرطورة

moon light جايب معو مجلة من مكتبة خالو : تعالو يا صبايا تفرجو على آخر الموضات .. شي صرعة .

أنا : عبطلع بحرف عيني : يا ياب ماأحلاهن ... هات لنشوف لك خاي

ابن الجبل من أول الطلعة : يا شباب حاج تهزو الشاحنة .. بدنا نعرف نركب الفيلم بالكاميرا بئى

الكابتن : اففففففففف يا .. لسه ما وصلنا .. صحي حدا جايب معو طابة .... ؟؟؟

موبايل مون لايت عم برن هوي حاطط موال لطنادو : ( هاتولي ورقة وقلم لكتب أنا حزاني يلي مر علي ما مر على حد تاني
ويترك مون لايت موبايله يرن ..

وعندما رد . مون لايت على الخليوي .. ينط شاعر الليل : لك تركاااااا يرحم ابوك ... خلونا نسمع هيك ءغاني أحسن من الءغاني الهابطة اللي عبيغنوها المصرعين ... قال دبكة ودبيكة ... والخاشوقة .. ورجب حوش صاحبك عني ... اشو هاد يااا
مون لايت عم يحكي على الخليوي و عم يقول
أهلين بكرمو .. والله لسه على الطريق يا معلم .. يالله رايحين نوصل
كرمو : ( كان مون لايت فاتح السبيكر منشان ما حدا يقلي كيف سمعتو ) : لك هاي انتو اللي بالشاحنة الحمرا ؟؟
مون لايت : اي اي .. شفتنا
كرمو : اي أنا على السطوح وعبلولحلكن بكشاشة الحمام .. ما شفتوني

مازن الحمود يمد راسه من الشباك : لك والله حليوة هاكرمو .. يووووووووووووو كرموووووووووو .. ما في فعّالات زيتون حولييكن ؟؟

نزل كرمو على الطريق وفتح باب المزرعة على مصراعيه .. وحواليه الجيجات والبط عبينطوا

وقال :

يتبع .............
تفاصيل المزرعة في الجزء الثاني ..

ولي بس ما اطلع انا الباص خخخخخخخخخخخ

الله يخرق جيابك يامون لاييت على هل قصة Suspect

علي الحلال خرج تكون كاتب درامي وكوميدي

بس بتعرف الله يعطينا العافية أنا وياك لأنو تعزبنا كتييييييير بشراية الغراض تبع الرحلة
وكلو كوم والغمة يلي اشتريناها من شان ( هلا وسكاي ستار) كوم تاني

مشكور حبيب عل موضوع

على راسي أحلى شريك

هههههههههههه [ندعوك للتسجيل في المنتدى أو التعريف بنفسك لمعاينة هذه الصورة]
اي والله كانت رحلة حلووة كتير
انبسطنا كتير
مون لايت خطط ل رحلة جديدة
مشان نكمل الجزء التاني
بس هالمرة على تركيا
مشكور
اما شو نهفة كتير مهضومة

زائر

أنا بروح لعند كرمو الديس..احلى عالم بشرفي,,,اماثل الشباب و يا حياللـه..
بس ترى ليكو الشرط حلو!! انا ما بقعد غير من جدام حد راعي الشاحنة مالتنا...

شاعر الليل
لك اهلين و سهلين بابو الشريك اي و الله الله يعطينا العافية انا واياك بس قولتك بيكتشوفوا انو هاي لحمة خربان و اشتريناها بنص حقها
لا تقول لحدا فيك

.............................................
هلا نور منيح كتير انك انبسطتي
بس الجزء الجزء التاني رح تكون جوات المزرعه
مشكورة على مرورك
...................

ساكو
اهلين فيك
بس و الله من قدام ما في محل بعدين لك خاي سعرك بسعرنا انا يلي منظم الرحلة طالع من ورا
دي طلاع من ورا و خلصنا
اهلين فيك يا ابو الشرك
ورحلة موفثة
انشاء الله

زائر

ياي شو هالرحلة بتجنن وخصوصي القهوي من تحت دياتي

كنتو رح تاكلو اصابعكون من وراها مارح تعملنا رحلة تاني عمو مون لايت Question

ولك ابن اسما ...... أن ما عطيتك مية ليرة ...... ليرة تنطح ليرة .... انشا الله لهفت المصاري .... لك والله كان قلبي حاسسني أنك بدك تدق النقاصة ... من اليوم ورايح ما رح ادفع إلا قدام شهود ... وشمان الـ 25 بعطيك ياهون على دوس بارة .... بس اصبرني لبعد العيد ....

اقتباس :

ياي شو هالرحلة بتجنن وخصوصي القهوي من تحت دياتي

رجاء ما حده يحكي ع القهوة بوجودي ........ بعمل قهوة من أطيب ما يكون .... خبرة 6 سنين ........ يعني أحسن من أحسن ست بيت ... واللي مو مصدق ...... يجرب .

مشكور حبيب ع هالموضوع المهضوم متلك .

ندى
اي الحمد الله انك تبسطتي بالرحلة خلص تاني مرة بدال القهوي جهزي حالك على طنجرة محشي مع كم راس غمي على شوية سمبوسك و كبي
بس
تشكري على هذا المرور الجميل

ثوندر ستورم
على الطربوش ما عطيتني 25 قلتلي بدي خاليها منشان اشتري حمراء قصير
ابو الفوز رح سلمك شوفير صينة شو رائك اذا كنت كتير بتحب تعمل قهوي

واحلا ابو الفوز الورد

قريباااااااااااااااااااااااااااااا ...... رحلة اعضاء منتدى كلية الاداب الى مزرعة كرمو الجزء الثاني فانتظرونا

زائر

لا مون لايت يعطيك العافية شو محاشي وغمي انا كنت عم امزح مابعرف اعمل لاقهوي ولا شي

ثاوندر ستورم اشطر مني هوي بيتكفل بالموضوع انا متنازلي عن القهوي ثاوندر خود المحاشي بطريقك

اشو يو حجي ندى خفتي من هدول الاكلات و راسا انسحبتي بكلامك
ااااااااااااخ بس من منكم انتو الحريم اخ
يلا اقلي كم بيضه خلصينا أمرنا لله

ثنوندر ستورم جهز حالك على طنجرة محشي و غمي يلا فرجينا شطارتك لنشوف

شو هالكرم الحاتمي [ندعوك للتسجيل في المنتدى أو التعريف بنفسك لمعاينة هذه الصورة] يا مون لايت قال الرحلة مجانية خرج ماتكون مجانية ولأ وهي بعد الدعم [ندعوك للتسجيل في المنتدى أو التعريف بنفسك لمعاينة هذه الصورة] ..آل شو أخدينا بسيارة شاحنة إي شو شايفنا غنممممم ..ولأ حمرا كمااااااااااااااااااااااان والله يستر ماتكون الرجعة بطرطيرة دارك لايت.. [ندعوك للتسجيل في المنتدى أو التعريف بنفسك لمعاينة هذه الصورة] ههههه أحسنين ...وياعيني على صوت طنادو وصوت الطرطيرة عم يجعر جعير [ندعوك للتسجيل في المنتدى أو التعريف بنفسك لمعاينة هذه الصورة] وأنت ملحوشششش بألبا لحش وهالهوايات يا سلااااااام عم تسفأ بوشنا سفئ [ندعوك للتسجيل في المنتدى أو التعريف بنفسك لمعاينة هذه الصورة] ولا أحلى من هيك خاصة لسى لهلأ ما رجعنا... أي شو قا عدين عم نساوي . [ندعوك للتسجيل في المنتدى أو التعريف بنفسك لمعاينة هذه الصورة] ..أحلايين نرجع بعز الشتي .....لسى على ريحة الغمة لهلأ مغمي عليي منها [ندعوك للتسجيل في المنتدى أو التعريف بنفسك لمعاينة هذه الصورة] .....مشكوررررررررررررر [ندعوك للتسجيل في المنتدى أو التعريف بنفسك لمعاينة هذه الصورة] أخ مون لايت رحلة ممتعــة....

زائر

انا حجي ياعمو مون لايت قد احفادك انا بعدين شو هي غمي ومحاشي
اذا مو صندويشة زعتر ما تقلي عملي شي
لان هي الوحيدة يلي ما بخربط فيا Smile

هلا
خلي يبين مع الاعضاء صحي لطشنا منكم ميو ورئة بس هاي منشان الاكل و الذي منوووو
ليش يو خيت ما عجبتك الشاحنة
هاي السكانيا بتتكلم والفولفو بيتألم
ااااااخ على الهويات غير شكل وشعراتي هيك عم يطيروا ياااااا سلااام
و لا صوت طنادو العذب يا خيت دخيل الله على هداك اليوم ما احلاه
اي باركين بمزرعة كرمو ومبسوطين لحقانين على الرجعة لسه في جزء تاني
شو عجبك الغمي هاي من طبخ خالتك الحجي ندى

تشكري على هذا الرد الجميل

ندى
خالتو ندى مارح نخجلك اعملي زيت و زعتر لكل الشباب و الصبايا يعني مو كويسي انصمد أنا اكل وهني عم يتفرجوا علي وانا عم باكل قضوضة الزعتر
بس لا تنسي الشاي

زائر

تكرم عينك ياعمو اي شو كم عمو مون لايت في لكل الاعضاء عروسة زيت
وزعتر للكل مع كاسة شاي روح

مشكورة يو خالتي ندى
انا بدي كاسة شاي كبيري
بس وحدي ما بتكفيني بدي تنتين

زائر

رح جبلك طنجرة يلي منطبخ فيا محشي ياعمو
لا بقى تناديني حجي

خلص حجي ندى ما رح ناديلك حجي بس ليش في أحلى من الواحد يكون حجي ههههههه
طيب خالي ندى منيح

بالنسبة لطنجرة المحشي
هوي محشي كوسا و لا محشي باذنجان و لا محشي قرع

زائر

لا طنجرة شاي مو بدك كاسة شاي كبيري
هي عملتلك
بعدين بكرة عيد انشاالله كل سنة والشعب بخير
رح تاكل محشي لتشبع

وانتي انشاء بالف خير
لك حدا بيجب الحكي لحالووو ندى ما دام جيبتي سيرت العيد لا تنسي تجيبي مع الشاي البيتيفور والمعمول والضيافي الله يرضى عليكي

زائر

هات لنشوف كرمك ياعمو شو مارح تجيب هيدي لاعضء المنتدى
مازال تكرمت وقلتلي جيبي الحلويات
تكرم عيونكون بس بس لحتى حج عالسوا مو بس صيت
ههههههههههههه

لك روحي يا ندى الله ياخدك الله ياخدك الله ياخد الله ياخدك على الحج منشان تصيري قول و فعل
و منشان الهديا تكرموااااا معقوا عمو مون لايت يخيلي عليه
بكرا كل واحد رح أعطيه نفاخة بيضل بينفخها حتى ينزلوا لوزاتووووووا
مع كل هل شي رح اعطيكم علكي مدعبلي

رووووح جخواااا بهل العيد

موضوععععععععع روعة أحمد
عقبال الرحلة النظامية Laughing

زائر

ميرسي عمو مون لايت الله ياخدك انت كمان

وعلى هالهدية الرائعة اي والله البابا ماعيدني هيك عيدي

الله ياخدني وياخدك وياخد كل الاعضاء على الحجي
قولوووووواااا امين

ندى انا هاي كلمة ميرسي وين بدي اصرفها كمان انا بالمقابل بدي هدي اشو يعني بس انا بهدي

خلص لا تزعلوا
أنا رح جبلكن هدية
للكل
رح جبلكن بون بون
روحوا جخوا بهالنعمة

هي هي هي هي هي هي هي هي هي هي
الله يعطيك العافي خالي هلانور
بس ادعميني و عطيني ايلي اكتر شي
أشووووو
لا تنسي

زائر

اي تكرم انا بجبلك فتيش مع انو العيد خلص
بس يلا معليش بينطقو هلق كمان
ههههههههههههههههه
بركي انشالله بتاخدك الشرطة بعيد الشرخخخخخخخخخخ

ههههههههههههههههه
بركي ما بجي لعند بيتكم بنص الليل و بلش طقطقه وبس اجيت الشرطة وقالوا لي من وين جيت هدول الفتاشات ولاك
بقلهم هاي ندى عطتني اياهم
و بياخدوكي معي خخخخخخخخخخخخخخخخخخخخخخخخخخبع بعيد المعلم

» رحلة أعضاء منتدى كلية الأداب على مزرعة كرمو الجزء الثاني
» @@ هيا يا أعضاء منتدى اداب ادلب .. معا لمكافحة الملل @@
» طريقة التسجيل في منتدى كلية الآداب بجامعة إدلب
» ***خريطة منتدى كلية الاداب الثانية في ادلب (( الجغرافيه))***
» يازائر منتدى كلية الاداب الثانيه بادلب هل تعرف من نحن!!