تربيةالحمام!هواية أم نمط حياة؟

من المجتمعات (الغيرة معروفة لكثير منا) هو مجتمع كشاشين الحمام أو (الحميماتية),ونحن الآن بصدد التعريف بهم لعل احد القراء ينضم إليهم ويأتينا بجديد.
الحميماتي من حيث الشكل انسان (فوق العادة) يرتدي بنطلون ضيق من فوق وسيع من تحت,إلو قشاط وزن 10كغ في عليه شي ب500 ورقة كبسات,و يرتدي في رجليه إما المنطوفة وهي كندرة كسر آخرها بيطلع منها نصف كعب الرجل بيصير عالأرض ,ولا بد ان تكون الجرابات بيض اللون.أو الشاروخ الديري (الإصبع) اللي فيه الكبسات تبع القشاط نفسها.
ولا بد من (اللوغو)المعروف وهو عبارة عن (تاتو)وشم بعبارات ملؤها الحكمة لتعبر عن أخلاق حامله!مثل: مجروحين...مسافرين ..رضاكي يا أمي (الله يعمن رضا!).
يعمل الحميماتي عادةكشوفير طرطيرة جنزير يكتب عليها نفس عبارات التاتو الآنفة الذكر,والبعض منهم عتالة او اعمال حرة!
يعبر عن تراثهم المتوارث مطربيهم العظماء متل:ابو سلمو,الحريتاني,ابو حسن قنزوعة,مطيع الواوا...حيث يمثل التراث الشفهي المنقول بالتواتر لحياة الأجداد,وبمواضيع تتناول مختلف جوانب حياة الحميماتي (اللي عطول الزمان والناس ضدو).
و لا يجب أن يغفل الدارس لهؤلاء الجماعات عن طقوسهم وأعرافهم و أهمها (المكبة)!...
ماهي المكبة:
والمكبة عبارة عن شبه عيد يقام في منطقة ما يتفق عليها ويبلغ الجميع بها بطريق لم استطع بصراحة اكتشافها!(ممكن النت او هيك شي؟).
ويتم اجتماع حميماتية المنطقة في هذا الزمان والمكان بحسب الانتماء الجغرافيوتأتي الناس من اصقاع الأرض(مو هالقد عم بالغ) لمشاهدة المكبة نظرا لأهميتها بين كشاشين الحمام .
قوانين المكبة:
بيجي كل واحد عالمكبة ومعو أحسن وامكن طيور عندو (يعني اذا بيكشن باوستراليا لبرجعو عالبيت) وبيعدو 1..2..3.. وبيطيروهن ,وبيبلش الصياح والزعيق والتشفيط بالركسات والطراطير! بقى كل واحد وحظو ,يابيرجعو طيورك لوحدن عالبيت,يابيرجعو و بيجيبو معن طيور تانية,يا ما بيرجعو خالص!و يا لطيف اذا هالحكي صحيح لأنو اذا حدا كمشلك طير عيب عليك تطالب فيه لأنو اسمها مكبة!يعني عالكب ,والابهدل من هيك انو بيصير كسر راسك ليوم ولد ولدك!مالك تغسل عارك غير بطريقة وحدي هي انو تدفع فكيكو (يعني الفدية)وتجيبو تدبحو ادامو بريشة من الطير نفسو,احسن ما العار يصيبك ويكون حدا من طيورو عم يجبلك خلفة جديدة بالحرام!.
ورح احكيلكن مرة عن مكبة حضرتا شخصيا في اطار رصدي للأحداث الهامة اللتي تحصل في بلدنا, وصار فيها مشكلة على مستوى دولي مع حميماتية تركيا بس نشوف شو رأيكن بالموضوع!

لك شو هل الموضوع الخيلي
مع كل كشة حمام نسمع كلام رومنسي وموسيقا حلوة كتير
بس والله اذا بتدخل على قلب الحميماتي بتشوفه انسان تاني
لا تشوف منظره والله انا بعرف واحد حميماتي اذا بطلب روحه بيعطيني اياها والله كله نخوة وشهامي

الله يعطك العافية على الموضوع الحلو

اقتباس :

[size=24]عرف الانسان تربية الحمام منذ قديم الزمان واعتمد عليه في ايصال
مشاعره واحاسيسه واخباره الى البلدان البعيدة
وكثير من الناس من عشق الحمام
وتربيته وجماله وامضى ساعات متواصلة وهو يتامل جمال ريشه وعيونه وحتى مشيته
وصوته
وطبقة الحميماتية طبقة واسعة الانتشار في مدينتنا اللاذقية ولها طقوسها
واعرافها وعالمها الخاص
فمن منا لم تقطع نومة قيلولته في الظهيرة اصوات وتصفيرات
الحميماتية وهم يتحدثون مع حمامهم الطائر في اعالي السماء
تعالو معا لنطلع على
هذه الطبقة والطقوس المتبعة عندهم في كارهم الواسع الانتشار على سطوح منازل

الحميماتية هم مجموعة من الناس مهووسة بتربية الحمام على اسطح المنازل
ولهم عالمهم الخاص يعيشونه على ثلاث مراحل
المرحلة الاولى عندما يفلتون الحمام
من منازله على السطح وينشرون له الطعام كي ياكل
المرحلة الثانية عندما تطير
الكشة في السماء ويبدا الاتصال بين الحميماتي وكشته عن طريق التصفير والادوات

المرحلة الثالثة فرحة الصيد اذا استطاع الكشيش اصطياد بضعة حمامات من كشة
جاره
ولهذا الكار مشاكل وسجالات ومعارك كثيرة ولكن وضع بعد الحدود لهذه المشاكل
بعد
ان وضع اعراف متفق عليها بين الصيادين بهذا الكار عبر اتفاقات ثنائية بين
الحميماتي وزملائه المجاورين له في المنطقة وتتجسدب
1_ طريقة الصيد اي ان كل
طائر يصطاد من كشة جاره المجاور هي حلاله وكل واحد وشطارته
2_طريقة الملص وتعني
ان كل طائر يصطاده صاحب كشة من زميله الاخر يملص له رقبته (يقرفها)
ويرميه لجاره
الذي اصطاده منه وهي بمثابة التعليم عليه
3_طريقة الصلح وتعني اي طائر يصطاده
الصياد من جاره يعيدها اليه ويادار ما دخلك شر
وهناك قهوة صغيرة في الشيخضاهر
اسمها قهوة الحميماتية
وهي عبارة عن محكمة فض نزاعات بين الحميماتية لفض النزاع
واتقاء المشاكل بينهم
وازا لم تحل يلجئون الى المواجهات المباشرة بينهم بالشارع
عن طريق الشنتيانت وسكاكين الكباس وشتى انواع السلاح الابيض
ادوات صيد الحمام

1_الشويرة وهي عبارة عن قطعة من الخشب الناري تستعمل للضرب على الارض او الجدار
لتخويف الحمام عند اقترابه من السطح وجعله يطير في الاعلى
2_الشبكة الطويلة وهي
عبارة عن سيخ معدني كبير باخره شبكة دائرية تستخدم لالتقاط الحمام
3_العلم
ويستخم قطعة قصب طويلة باخرها علم تستخدم للتلويح للحمام لكي يهبط الى سطح
صياده
4_التصفير وتستخدم لتطيير الحمام الى طبقة اعلى من الطبقة الموجود
فيها
5_التخبيط وهي عبارة عن حمامة انثى فائقة الجمال توضع على سطح صاحبها
لتتغندر وتتكزدر
لجلب ذكور من الكشات الاخرى ليتم اصطيادهم عن طريق صاحب هذه
الانثى الجميلة
ومن انواع الحمام
الاسود دنب_الارباطي_الئلاب
_الهزاز_الكشميري_الهندي
كما قال الشاعر منذر عبد الهادي
فرجيني هالكازندي
وجوز المساويب
قالولي عندك شخشرلي قبضاي وعجيب
وأحلى ئعدة عالصطوح والحابيس
انضيف وممسوح
كل نهارك عمبتلوح وتخبيطا بالإيد
عندي جاري اللي مئابيلي أنا
وهو صيد
وعالدئرا ئاعد لاطيلي وعاملي عكيد
ونبينا محمد إزا منعندي بيتصيد
طير
آخرتو بخليا تئرب وبزتو من فوء الأنتير
بحطلك ئبريء الشاي وبئعد
عالسطوح
وين مبروحو اللحمامات أنا فكري بيروح
ولحبابي ودي سلامات والئلب
مجروح
يا طيور حكولو حكايات عسطوح الليبعيييييييييييييييد

اسما الموضة عندكن الرد عالموضوع بنسخ موضوع تاني..فتكرمواااااااا

عراسي آدمن بيك..

اقتباس :

بس والله اذا بتدخل على قلب الحميماتي بتشوفه انسان تاني
لا تشوف منظره والله انا بعرف واحد حميماتي اذا بطلب روحه بيعطيني اياها والله كله نخوة وشهامي

هوي عادي يا حبيب..هاي عيونك الحلويييييييي وي وييييي

أنا ما عبر دعموضوعك بضيف معلومات

بصراحة تربية الحمام عادة سئية وللاسف موجودة تقريباً بمعظم محافظات سوريا.........
هادا رأيي بصراحة
مشكور زميل فادي على طرحك للموضوع

اقتباس :

أنا ما عبر دعموضوعك بضيف معلومات

جزاك اللـه خيرا باسمي و باسم كل حميماتي على سطح بيت..

اقتباس :

بصراحة تربية الحمام عادة سئية وللاسف موجودة تقريباً بمعظم محافظات سوريا.........

وبادلب اكتر شي...

مشكورة على زيارتك للحبيس..!!عفوا لموضوعنا...

والله ما عبعرف شو هالهواية بكش الحمام
يعني الواحد يقعد يقرأ كتاب مفيد مو أحسن من هالهواية
والله وقت اللي كنت عبقدم بكلوريا تعقدت من جارنا كشاش الحمام
وكل معلوماتي طارت مع الحمامات

شقد عبيسوا الأسود دنب خااااااااااااااي

اقتباس :

والله ما عبعرف شو هالهواية بكش الحمام
يعني الواحد يقعد يقرأ كتاب مفيد مو أحسن من هالهواية

دخلك انو كتاب هيدا اللي خرج الواح يقراه مع شريط كاسيت للمطرب ابو سلمو و كاسة عرق بلدي متلوت و على سطح بيت و يعبي راس واحد متل عمك ابو ثابت ؟؟؟
جيبيلي هيك كتاب لاعلن لالك ولادة شكسبير جديد...

اقتباس :

شقد عبيسوا الأسود دنب خااااااااااااااي

حدا قلك انو عم اشتغل ببورصة حمام انا؟؟؟

اقتباس :

حدا قلك انو عم اشتغل ببورصة حمام انا؟؟؟

يعني بدك تلعب دور الشب اللي من عيلة أرستقراطية لك أبو الفيد لا تخلينا نفضحك و نقول للشباب أنك من قهوة الحمام ما بتطلع

منوّر حبيب

,وبيبلش الصياح والزعيق والتشفيط بالركسات والطراطير!

عفكره الادالبه اخدو رقم 1 بكش الحمام ........انا كنت ساكن بالشام وقالولي انو الحمام خلق لادلب وبس هههههههههههههههههههه

وليش مدايق مصطفى

هههههههههه
اشو هل المعلومة الحلوة

وليش مدايق مصطفى?????????????????????
متدايق لان بابا اذا بحوي حمامه ع السطح بيدبحني قبلا ههههههههههههههههههههههههه

على الطلاق يا خاي البركي على السطوح مع كاسية شاي اوكرك عجم مع شريط لطنادو افلوت فيها الحمام بتسوى الدنيا وما فيها يا خاااااااااااااي

اقتباس :

يعني بدك تلعب دور الشب اللي من عيلة أرستقراطية لك أبو الفيد لا تخلينا نفضحك و نقول للشباب أنك من قهوة الحمام ما بتطلع

منوّر حبيب

هلأ شو من شان انو الصديق شاف بعينو و غطا بديله؟؟
برأيك ننكش غزلات جسر الشغور الفاضلة هون لك ايبو الفوز؟؟