هل تعرف نقطة ضعفك؟؟؟؟؟؟؟؟؟؟؟

لو كل واحد مننا ، فكر بجد انه ياخد أهم قرار فى حياته ، وهو انه يبدأ يغيير من نفسة ، ويصلح علاقتة مع ربنا ، هيلاقى ان فى بلاوى وذنوب كتير عاملها فى حياتة ولسة مستمر فيها ، ومن كترها حس انه خلاص مفيش أمل ، واكتفى بكلمة (ربك غفور رحيم ) ، والغريبة انه افتكر الاسمين دول بس من اسماء الله الحسنى ، وكأنه نسى ان من اسماء ربنا ، اللى نسيها أو عامل نفسه نسيها ، المنتقم والجبار والقادر والعزيز والمهيمن و القهار وغيرها من الاسماء الحسنى ، أو يقولك ربنا يهدينى ، من غير حتى انه يفكر يقرب بجد من ربنا ، و بيقولها كمان من وراء قلبه ،
و زى ما قالوا إذا أحسنت الظن أحسنت العمل.
النهارده انا جايبلكم بفضل الله دعوة حلوة أوى ، هاخليك تقابل انسان انت بتحبة قوى وهو تقريبا كرهك من اللى بتعمله فيه ، بس انا عايزك تقعد معاه على انفراد ،
وفى مكان هادى ، وتقطع كل اتصالاتك بمن حولك ، وكمان تقفل تليفونك ،
متخفش المقابلة دى مش طويلة ، دى كلها ربع ساعة بالكتير ،

بس صدقنى هى مقابلة مهمة أوى فى حياتك ، عرفت يترى مين الانسان ده ، الانسان ده هو... أنت......

عايزك تقعد مع نفسك وتكلمها وتشوف ايه الذنوب اللى أنت أدمنتها يوميا وايه اللى تقدر تبطلة دلوقتى وايه اللى متقدرش ،
هتلاقى حاجات كتير بتقول انك تقدر تبطلها ، طبعا بفضل الله ، وحاجات صعبة شوية ، بس سهلا بإذن الله ، ولو بصيت فى كل ذنوبك هتلاقى ان فى ذنب معين ،

هو أكتر مشكلة عندك ، وباقى الذنوب مترتبة علية ، انا مش عايز اقول امثلة ، لأنك أكيد عارف نفسك أكتر منى ، وأعرف أن الذنب ده ، هو بجد نقطة ضعفك ، وطبعا مفيش حد يحب فينا انه يكون ضعيف وفى حاجة فى حياتة ممكن تكسره ، ففكر انك ازاى تتخلص من النقطة دى ، وأعرف أنك لو قدرت على نفسك هتقدر على أى حاجة فى الدنيا ،

ومعتقدش ان فى حاجة فى الدنيا تستاهل تخليك تبعد عن ربنا .

ولما سألت كام واحد من اصحابنا اللى من الشباب المسلم ، ايه اكتر نقطة ضعف فى حياتك كانت الاجابات زى كدة..........

واحد يقولك المشكلة فى البنات ولبسهم ، وانا مش بعرف اغض البصر ، وهما السبب منهم لله

.....
هقولك ان ربنا يستحق لما يبص فقلبك يلاقى كل حاجة متعلقة بيه ، لأنه هو اللى خالقك وبيأكلك وبيشربك ومعيشك فى أرضه ، وكل ده ببلاش ، فأنت مش بالنظرة للبنت بتاخد ذنب بس ، دى الصورة بتاعتها بتطبع فى قلبك فبتعمل حائل كبير بينك وبين ربنا ، وبتقسى قلبك وتسووده ، وبعدين انت وماشى فى الشارع وتشوف بنت جاية عليك ، افتكر ان ده اختبار من ربنا ، ويترى هتبص ولا لا ؟؟ لو بصيت هتاخد نقطة سوده فى قلبك ولو مبصتش هتاخد نقطة بيضة ، يعنى لو نزلت ساعة واحدة بس فى الشارع ، دى كفاءة إنك تبيض قلبك أو تسوده.
وبعدين البنت اللى بتلبس لبس مش محترم ، حسابها عند ربنا مش انت اللى هتحسبها ، ومش حجة ليك....واعرف ان الشيطان بيستخدمها كوسيلة بيحاربك بيها ، فأعرف عدوك وانتبه لأدواته....

.................................................. ........................................

واحد يقولك ان مشكلتى كلها صحبتى ، لو سبتها هأقدر أقرب من ربنا أكتر ، بس أنا خايف عليها لو بعدت عنها تحصلها حاجة من كتر حبها ليا ، ده غير انى انا عايزها فى المستقبل زوجة ليا مش لحد تانى.......

هقولك لا يا حبيبى سبها ومتخفش عليها مش هيحصلها حاجة من بعدك ، ومعتقدش اننا سمعنا حد ساب صاحبتة فماتت من الصدمة ، وبعدين انت اصلا متقدرش تحمى نفسك علشان تحميها وتخاف عليها ، ومتنساش انك مش أرحم عليها من ربنا ، وربنا الحافظ ، ولو أنت عايزها فى المستقبل بجد ، اتقى الله فيها لأن ما عند الله لا ينال إلا بطاعتة ، واحنا كلنا لا حول لنا ولا قوة إلا بالله ، ومن ترك شيئا لله عوضة الله خيرا منه ، يعنى سبها دلوقتى وربنا هيعوضك ان شاء الله بزواج وذرية صالحة خيرا من المقابلات والتليفونات اللى واقعه علينا بخسارة ...... دنيا واخرة.....................

.................................................. ......................................

واحد تانى يقولك نقطة ضعفى أصحابى ، ولو هما أتغيروا أنا ان شاء الله هتغير،

هفكرك انك لما تموت هتموت لوحدك وهتدفن لوحدك وهتتحاسب بين ايدين ربنا كمان لوحدك ، يبقى يترى الاصحاب هينفعونا فى اللحظة الصعبة دى إلا بقى لو كانوا صالحين وبتحبوا بعض فى الله وبتعينوا بعض على طاعة ربنا ، يبقى كدة ممكن أطمنك وأقولك إن شاء الله هتكون فى ظل الرحمن يوم لا ظل الا ظلة ، نرجع للاصحاب التانية ، انا عارف والله انهم رجالة وطيبين بس منقدرش ننكر إنهم فى غفلة ، ففكر إنك تخرج من الغفلة دى وتخرجهم معاك ، قدرت على كدة يبقى الحمد لله ، مقدرتش يبقى لازم تبعد عنهم ، وتسأل عليهم من بعيد لبعيد ، وادعى ربنا يهديك ويهديهم ، وأسأل الله انه يكرمك بصحبة صالحة .

.................................................. .....................................

واحد يقولك انا نقطة ضعفى المخدرات ، ولما أفكر أبطلها بقول فى نفسى ، ابطلها ليه؟؟ وايه الممكن اللى أعمله بدل المخدرات ، الحياة مملة ومفهاش حاجة جديدة أعملها...................

هفكرك اننا مخلوقين لعبادة ربنا ، هتقولى منا عارف ، هقولك لو عارف بجد ، مش هتشرب مخدرات تانى ، لأنها سكة من سكك الشيطان اللى بيعرف ينسينا من خلالها عبادة ربنا ، زى الصلاة مثلا ، والمخدرات بتخلينا نفكر فى نفسنا وبس ، هنجبلها فلوس منين؟ وهنشربها فين؟ ومع مين؟ وانا سمعت حديث خوفنى قوى على كل اصحابى اللى بيشربوا مخدرات وهو قال (صلى الله عليه وسلم) : مدمن الخمر ان مات لقى الله كعابد وثن . وثن يعنى صنم ، أعوذ بالله ، ومتقلش المخدرات غير الخمره ، هقولك انك كده بتشتغل نفسك ، لان الخمر كل ما يغيب العقل ، وكلمة الخمر من كلمة خمار المرأة ، أى ما يغطى العقل ، يعنى اى حاجة بتغيبك عن الوعى فهى خمر ، وبعدين الدنيا فيها حاجات كتير تتعمل ، لأنك ببساطة كده الدنيا دى مش مكانك ، لأن احنا المؤمنين مكانا اصلا فى الجنة وأبونا أدم كان فى الجنة ،
بس بسبب المعصية نزل ، واحنا موجودين فى الدنيا علشان نرجع تانى للجنة ، يعنى تقدر تعمل حاجات كتير فى الدنيا زى صلة الرحم ، هتزور اقاربك ولو خمس دقايق وهتاخد بإذن الله حسنات كتيييير ، الصلاة فى الجامع ، الرياضة ، الكورسات اللى ممكن تخلى ليك قيمة فى وظيفتك، اعمال الخير زى مثلا تزور الناس اللى فى المستشفيات وتقولهم ربنا يقومكم بالسلامة ، او تجيب هدومك القديمة وتعطيها للفقراء والغلابة ، والله كلها حاجات سهله مش صعبة ، وحاجات كتير ممكن تعملها خير بس تشغل مخك لحساب ربنا مش لحساب نفسك .

.................................................. .....................................
واحد يقولك ان مشكلتى الوحدة ، لما بكون لوحدى بضيييع...

هقولك طيب ليه متغيرش النظرية دى ، يعنى تخيل لو انت لوحدك وقعدت تفكر فى ربنا وتفكر فى نعمه عليك ، وانه كرمك عن ناس تانيه كتير ، وياااااااه لو جبت دمعة ، أضمنلك ان شاء الله ظل عرش الرحمن يوم القيامة ، لأنك كده هتكون واحد من السبعة اللى هيظلهم ربنا فى يوم لا ظل إلا ظلة...رجل ذكر الله خاليا ففاضت عيناه...وأعلم عندما تستوحش الناس وتشعر بالوحدة ،أن الله يفتح لك باب كى تأنس به
.................................................. ................................

واحد يقولك السجاير هى نقطة ضعفى ، وممكن مكلش بس لازم اشرب سجاير.

هقولك ياسيدى لو انت مش مقتنع انها حرام وبتقول انها مكروه ، طيب لو واحد بيحبك وبيجبلك كل اللى انت نفسك فيه ، ومغرقك فى كرمه ، وانت بتعمل فى اليوم عشرين حاجة هو بيكرها ، يترى هو هيحبك؟؟؟ ولله المثل الاعلى .
واعرف انه فى عشرة الالاف واحد بيموتوا فى العالم بسبب السجاير يوميا .
فيترى لو انت مت بسبب ولو واحد فى المية من السجايرهتبقى منتحر ولا لأ؟؟؟؟
ربنا قال ولا تتبعوا خطوات الشيطان ومقلش طريق الشيطان ، لأن الشيطان ليه خطوات ، فخاف لحسن تكون السجاير دى خطوة متقدمة فى طريقه...واعرف اخيرا ان ربنا عايزك تبطل سجاير ، والشيطان عايزك متبطلش
شوف بقى هتعمل حساب لمين؟؟؟؟؟؟؟؟

.................................................. ........................................

واحد يقولك انا زى الفل بصلى ومبشربش ومية مية بس مشكلتى لسانى ، والقعده مبتحلووش من غير ما نجيب فى سيرة الناس ...

هقولك ان اللسان ده مشكلة لأنه اساس اى مصيبة ، وانت بكدة كأنك ماسك شوال حسنات ومخروم من تحت ، وطول مانت بتتكلم فى سيرة الناس شغال تضيع فى حسناتك ، ده كمان فى يوم القيامة اللى بيغتابوا الناس ليهم مشهد فظيع ، ناس بتاكل لحم ميت ، لانه يقول سيدنا "أبو هريرة" -رضى الله عنه- إن رسول الله -صلى الله عليه وسلم- قال: (من أكل لحم أخيه في الدنيا قرب إليه يوم القيامة، فيقال له كله ميتاً كما أكلته حياً فيأكله فيكلح ويصيح)
وفى حديث تانى يقول صلى الله عليه وسلم : لا يدخل الجنة منان.
.................................................. ........................................
واحد يقولك انا عملت كل حاجة غلط فى الدنيا ، كل ما يخطر على بالك انا عملته.

...
طيب يا سيدى ربنا يغفرلى ويغفرلك ، بس انت فى حاجة لسة معملتهاش ، صحيح انت عملت كل حاجة الشيطان عايزك تعملها ، بس لسه معملتش هدفه الاساسى ، عارف ايه ؟ الكفر ....عافنا الله واياك ، بس دى الحقيقة ان الشيطان مش هيرتاح غير ميوصلك للكفر بالله ، وانت فى طول الطريق معاه ، عامل زى واحد بيرجع بعربية للخلف والشيطان شغال يقولك ..تعالى تعالى تعالى لغاية ميغبطك فى العمود واللى هو ببساطة الكفر، ففكر انك تتوب لربنا ، وربنا هيبدلك كل ذنوبك حسنات ، وياريت متقولش كلمة انا عملت كل حاجة ، لان ربنا سترك ولولا سترة مكنتش عملت كل حاجة ، وربنا بيغفر لأى حد إلا المجاهرين بالسوء.
.................................................. .................................

كفاية كده كلام ، ويالا نبدأ بالافعال ، قوم اغسل وشك وفوق من الغفلة دى ، وخد عهد على نفسك انك تبدأ فى التغيير من نفسك ، وابدأ بنقطة ضعفك واتنازل عنها لربنا ، وهتلاقى الدنيا احلى وكمان.....الجنة احلى بكتييييييييييييييير

وقول الحمد لله على انه عقلك لسه شغال وبتفكر بيه دلوقتى ، لأنه سبق وفكر ودبر ازاى يعصى ربنا ، ومع ذلك ربنا كبير ، ومنتقمش منك حتى الان..

أستغفر الله الذى لا إله إلا هو الحى القيوم وأتوب إليه

اللهم إنى ظلمت نفسى وأعترفت بذنبى فأغفر لى فإنه لا يغفر الذنوب إلا أنت
اللهم وأرزقنا الاخلاص فى القول والفعل والعمل

وصلى اللهم على سيدنا محمد وعلى اله وصحبة وسلم
والسلام عليكم ورحمة الله وبركاتة
واخر دعوانا ان الحمد لله رب العالمين

لا تنسونا من صالح دعائكم

منقوووووووول

مشكور أخ مازن على هذا الموضوع القيم
وجزاك الله عنا كل خير
والله نحن بحاجة للكثير من هذه المواضيع التي هي من صميم ديننا
ونحن بحاجة للجلوس مع أنفسنا كثيرا
حاسبوا أنفسكم قبل أن تحاسبوا
قال صلى الله عليه وسلم :
تركت فيكم ما إن تمسكتم به فلن تضلوا كتاب الله وسنتي
فما وصلنا إلى ماوصلنا إليه إلا لبعدنا عن ديننا

مشكوووور مازن
كبيييييير يابن بنت عم امي

» نقطة آخر السطر
» نعم نقطة سوداء في مباراة امية والوحدة وهي التحكيم
» كيف تعرف شخصيتك
» كيف تعرف أنك مصاب بالحب
» هل تعرف ما هو سر الخد الايمن ؟؟