صارت معي هالقصة من زمان أول ما كنت عم أدرس بالشام (لسه غر يعني,,و ركزولي على كلمة غر),اتعرفت على شب كتير أكابر عايش بالشام مع أهلو,وعلاقتي بهالشب اتطورت بسرعة و انتقلت إلى معرفة ما بيني و بين أهلو اللي
عن جد يحسد على أكابريتهن ...وسارت الأمور إلى سهرة من السهرات اجتمعت فيها مع اختو للزلمة,وبصراحة لفتت نظري هالمخلوقة ما بخبي عنكن..كل شي فيها حلو شكلا...لبسا..حكياتا...خيو كاملة..ويبدو أن النظرات اللي صارت
يومها حسستو بشي...رجعت عالبيت..وما عم إنساها لهالمخلوقة!!بس بيني و بين حالي كتير متردد او بالأحرى رافض فكرة احكي معها مشان مشاعر الرجال.
ما بخبي عنكن إنو حكت معي البنت مرة وحدة عالموبايل,بس أنا قلتلها نفس الحكي اللي عم فكر فيه و هيي تقبلت الموضوع على مضد,و صرت خفف زيارات من تحسبا لوقوع الخطأ!!
وبيوم من الأيام بيجي الشب يسهر عندي بتفاجأ أنو بيقلي التالي:"ليك فادي!أنا حاسس فيك..كلنا شباب ومنفهم عبعض..بس يكون ما عندها دراسة أنا بخليها تطلع معك مشوار برضاي"...أنا طار عقلي..صيفت..و كنت رح
بوس*&^؟؟ايدو!على هالخدمة...
تاني يوم بيرن التلفون..حكاني الشب و قالي شوف مين بدو يحكي معك!ولا هيي تقبر قلبي!..واتفقنا نطلع مشوار بس متل ما طلبت هيي "عحديقة تشرين" وأنا ما عارضت (لو قالتلي عجهنم رحت)!
مالكن بطول السيرة طلعنا عحديقة تشرين واخوكن ما عاطي فرحتو لحدا...فتنا..قعدنا عالمقعد..وانا مو مصدق وهي طالعة متل الملاك بالابيض..
بلش الحكي اللي بتعرفوه و ما لازم ينقال ...بس ما طولت الحكايةخمس دقايق..بيجي ولد ما بيطلع طولو شبر!شكلو نوري,حامل علب كولا عكتفو.."كولا!!كولا!!بتشربو كولا معلم؟"قمت سألتها بتشربي كولا؟قالتلي لأ..قلتلو للولد:"روح
حبيبي هلأ ما بدنا"..بس ابن الحرام-يفضح عرضو-غط ما في خمس دقايق ورجع لعند سمايي:"كولا!!كولا!!بتشربو كولا معلم؟" قلتلو لك حبيبي ما صرلك شي جاي وقلنالك ما بدنا..تيسر هلأ...
رجع الولد كمان غط شي ثلاث دقايق و رد رجع نفس الموشح"كولا!!كولا!!بتشربو كولا معلم؟"أنا قلتلا بدك كولا قالتلي:"ما بدي ضراب السخن طرقو كفين لهالقرد وقلعو"..(شو هاد مو من عادتها تحكي هيك)المهم سحبتو للولد..دحشتلو
بجيبو 10ليرات..و قلتلو "تيسر يستر حريمك,ما وصلنا لهون وما حدا يعرف حدا!"..يا شباب وهي شافتني عطيتو 10ليرات جنت الحيوانة!.."أنا ما قلتلك طرقو كفين و قلعو؟عم تعطيه مصاري,روح انقلع ولا!"..والولد ما في ترباية و
بلش هوي وياها قلي لقلك..و محسوبكن ما حدا عم يرد عليه!.......
و بلا طول سيرة...بلشت المساببات ما بيناتهن و انقلب الحسن و الجمال والاكابرية لصياعة...و شي بهدلة...خدودا الزهرية صار لونن خمري...و شفايفا صارو زرق...وعيونا اللي كانو زرق صارو حمر قد ما معصبة...
المهم بينط السعدان و بيقوللنا:"اي انا بفرجيكن!"و يا جماعة عينكن ما تشوف إلا النور! غط شي دقيقة و جايب معو:البويجي+بياع العلكة+اللي بيمسح سيارات+شي 10 شحادين و كلن قرود عشكلو و ما بتعرف واحد من واحد...و بلشو
فينا مسبات بالقرباطي و سفق حجار!و حبيبة القلب وا أسفاه!!!حاولت تقاوم و انا معها بس وين ...تقولنا بالانتفاضة..."يا حبيبتي فركيها".."أنا بدبرن!"..هيك انتهاءاً بـ"حبيبتي لعما ضربك شو فاجرة!"..
و تاكل حبيبتي حجر طايش يجي بين عينيها ,والدم بلش يكت!..أنا قلبي صار بين رجلي...والحاصلو رحت طرقتا قطبة محل الجرح..و اتصلت باخوها...وبالخلاصة كان الجواب"طلاع من حياتي الله لا يوجهلك الخير شوهتني!"...و
رجعت الى المنزل اجر أذيال الفشل و النهاية رح اتركها لمخيلتكن.......وضليت شي أسبوع عم إبكي عالحب اللي ضاع...
هي قصتي بلا زيادة يشهد الله و بتمنى تشاركوني بردودكن عن شي نهفة مشابهة,,(بس من قلب ورب هه)...و اكيد بدون ما تضحكوا عليي...
